Nalika Aku Tekan Pesisir

Geguritane Bonari Nabonenar

Cendhela

saka bolongan

tatu ing atiku katon

lintanglintang kumrelip

ing langit bening

ana manuk iber

mencok soroting wengi

njut aku gawe pigura

kanggo bolongan ing atiku

26 Februari 1990

Lakon

aku pandhita mudha mertapa neng guwa garba

kakang kawah adhi ariari ayo budhal ngulandara

njajah wana napak tilase sang prabu rama

ngupadi jatining tresna

yen njur kesasar neng metropolitan

dikrubut sewu sarpakenaka ngajak jojing

sawise lan sadurunge meksa aku ngombe sewu gelas anggur

lan sewu gelas wiski

njur luntur kapandhitanku

aku isih aku apa

aku dadi aku

dadi

apa

aku satriya mudha tapa sadawaning marga

banyu angin bumi geni aku pengin

mecah ombaking samodra napak tilase sang bratasena

ngupadi jatining tirta

yen njur kesasar katut ilining prahara ngebaki samodra

dikrubut sewu rasa tidhatidha ngajak bali nglare

sawise lan sadurunge meksa aku ngombe

ngentekake banyune samodra kang ora bakal entek 

nganti kapan wae

nganti ilang satriyaku

aku isih aku apa

aku dadi aku:

sudra saking sikudhendhaning jawata

0609-1987

Prau

prau  layar kang anggliyak ing ombak lumembak

iki prauku lan praumu kakang

layare ginelar saambane rasa kangen

lan pengkuh saking sisete tali katresnan

yen aku miris nyawang ombak mawalikan

mbokajak aku dolanan lintang-lintang

iki prauku lan praumu kakang

ginelak sindhungriwute angin panguripan

Panakawan, No 031/01 – 15 Okt 1991

Kaki Tuwa

persis sapinggire sepi

takprangguli kaki tuwa kang tekene wis katut wungkuk

nyawang adoh

nyawang papan jumedhule srengenge esuk

angin lan srengenge wis ngrusak sakalir

kaki tuwa kebandhang ing lungkrah

lungkrahe dhewe

kedawan-dawan sumendhe rasa sumarah

bubrah sawernane rupa

bubrah sakehing rasa

mung kari pait

kari jingga temangsang ing candhikala

ing telenge sepi

sepine dhewe

kaki tuwa nyawang adoh

sambi ngematake tintrim

embuh

karo sapa dheweke semayan

Surabaya, 1994

Surabaya Post, Minggu, 18 Desember 1994

Nalika Aku Tekan Pesisir

aku wis tekan pesisir

ombak lumembak nyrangap sewu mata tumbak

nyawang aku

sing maune nglangut kaya banjur dadi cumepak

mung gurit saya mbebeda anggit

aku butuh sapupuh wae

aku pengin kaya wong wong nemokake

ing kene

mung aku mung wenang nyawang

sakeplasan sembarang mampir sadurunge kabuncang

*

1992

Cathetan: guritan-guritan iki wis nate kapacak ing:  Tabloid Panakawan, Minggon Jaya Baya, Surabaya Post Minggu, lan ing Gurit Panglipur Wuyung.